Amazon創辦人Jeff Bezos即將於7月20日孖住細佬乘搭火箭衝上太空，成為Blue Origin首批太空遊客，實現童年「太空夢」。不過就因為風險太大，暫時冇保險公司敢對Jeff Bezos以及同行者承保。換言之，如果今次太空之旅有咩冬瓜豆腐，Jeff Bezos同乘客完全係自行承擔。

據《路透社》報導，雖然保險公司一向為各種千奇百怪嘅風險提供承保服務而聞名，可惜就未包括太空發生意外嘅潛在風險。美國保險資訊協會（Insurance Information Institute）發言人Michael Barry就話「太空旅遊確實涉及重大風險，但目前唔係人壽保險公司特別關注嘅領域，話晒冇咩人會去太空旅行。」

Blue Origin可重複使用重型運載火箭「New Shepard」。

另一方面，保險經紀人同保險公司亦指出，雖然火箭、衛星以及無人太空飛行保險市場規模接近5億美元，但目前並冇法例要求Blue Origin呢類公司要幫乘客買保險先可以成行。換句話講，Blue Origin唔似得現時一般航空公司必定要幫乘客買保險，就算冇幫乘客買保險都唔犯法，不過如果佢想買，都應該冇未有公司夠膽承保。

「New Shepard」嘅返回艙。

今次Jeff Bezos將會乘搭Blue Origin「New Shepard」載人火箭上太空，到時會喺海拔100公里嘅「卡門線」停留數分鐘體驗無重狀態，再返回地球。翻查資料，「New Shepard」已經完成15次無乘客試飛，照道理就唔會出咩大問題嘅，但如果咁唔好彩出咗意外，都唔知點賠償畀同行嘅乘客。

資料來源：路透社