近年無論係因為電競興起，又或大家多咗時間在家工作，唔少人都可能考慮緊要添置返張電腦檯、甚至買部新電腦。但香港地方有幾闊落大家都知，依家砌部機有幾貴大家亦應該有聽聞，咁仲有冇其他方法呢？有！就係去日本！因為日本有企業對出「電競電腦租借服務」，而且租電腦送間房！

圖片：esportsroom.jp

呢間名為「eroom」嘅日本公司，就係睇中大家屋企未必有位、銀包未必有錢去放哂電競電腦、電腦檯、電競椅等設備，於是推出租借服務，用家最平就可以用39,000Yen，即係大約HK$2,700一個月嘅價錢，租到一部包含Inter Core i7 (或同等) 處理器、GeForce GTX1650顯示卡嘅入門級電競電腦，而且仲送哂一切週邊——「一切」嘅意思係包括電競滑鼠及滑鼠墊、電競鍵盤、24.5吋電競顯示屏、以及電腦檯、電競椅，以及放哂呢啲嘢再加基本生活設備 (如床) 嘅一間房。

如果你想部電腦勁啲，亦可以選擇升級到每月69,000Yen (約HK$4,700)租部有AMD Ryzen 7 5800X及GeForce RTX3070Ti嘅強勁電腦，同樣附送一切週邊以及間房。

圖片：esportsroom.jp

除咗針對電競玩家之外，eroom亦有為電腦插畫家以及影片製作而設嘅選擇，其實都係部電腦嘅配備有些少唔同，反正都係電腦加週邊加間房嘅配搭。另外eroom亦提供室內設計服務，即係你本身有間屋，佢因應要求幫你設計專屬嘅電競或工作房間咁。當然收費就按不同要求而訂。

講真HK$2,600租部電腦就未必抵玩，但$HK$2,600租間屋就唔同講法啦！唯一問題就係佢目前只喺日本嘅仙台縣提供服務囉。