語言作為溝通基本工具，唔識對方語言就冇辦法好好咁交流，日前Meta就喺線上活動《Inside The Lab》宣布，佢咃開發緊一款基於AI技術嘅「通用語音翻譯器(Universal Speech Translator)」，期望可以即時翻譯全球所有語言，推動元宇宙發展。只要假以時日...去日本咪可以暢通無阻？Meta，呢舖我就撐你嘞！

Meta認為現時雖然有唔少優秀嘅翻譯系統，能夠好好咁處理英文、中文、西班牙文等常見語言，但世界上仲有20%人嘅語言係未呢啲翻譯系統所涵蓋。有見及此，Meta翻譯系統其中一個目標係「No Language Left Behind」，希望重新設計一套AI語言訓練模型，用較少嘅文本及訓練次數就可以令系統學職該語言。

另一個目標則係「Universal Speech Translator」，由於現時嘅翻譯系統多數係透過「文字」形式翻譯，情況就好似你對住Google翻譯講嘢，嗰App都係將你段語音變成做文字後再翻譯，咁樣除咗翻譯得慢，同時對本身冇文字系統嘅語言嚟講亦唔友善，所以Meta嘅翻譯系統將會以語音為主軸，期望可以做到語音實時翻譯。