對唔少已婚男人黎講，打機嘅最大敵人並唔係遊戲入面嘅對手或Boss，而係真實世界中嘅老婆，因為只要你一打機，佢哋就會使用「你又打機」同「你淨係掛住打機」兩大絕招，唔少男人就唯有棄Game。不過外國就有個人妻見到老公沉迷於《Elden Ring》，所以決定送上一個驚喜——50萬盧恩！

圖片：截圖自Reddit

《Elden Ring》中嘅「盧恩」同時兼具「遊戲內金錢」以及「升級經驗」兩大重要功能，而且遊戲機制係只要你角色一死，身上所有盧恩會跌落地，而如果你喺執返啲盧恩之前再死多次，跌咗落地嘅盧恩就會消失，所以一個唔覺意唔見十萬八萬盧恩都係等閒事，「儲盧恩」就成為所有玩家們嘅課題之一。

卻說早前Reddit有位人妻開Post，話佢見到老公隻《Elden Ring》角色身上只有區區1.2萬盧恩，於是決定喺老公返工時幫佢「農」到50萬，為對方送上驚喜。雖然目前《Elden Ring》中有好多快速「農」嘅方法，50萬盧恩其實唔需要太多時間，但嗰啲方法都唔係一個完全唔打機嘅人可以快速掌握。換言之呢位人妻一係本身就有打機，一係就花咗一定時間去學習遊戲嘅操控以及農盧恩嘅方法，無論點睇都非常令人羨慕！

圖片：截圖自Reddit

不過喺網上Post呢啲甜蜜嘢就一定會惹來「葡萄友」。有網民就話識農嘅話好快啫，有咩特別、有人就話獲得盧恩本身都係遊戲嘅樂趣之一，人妻咁做係破壞咗老公嘅遊戲體驗、有人就好黑心咁希望老公完全唔發現盧恩變多，然後死一次，再死一次，一切清零。

不過據人妻事後就回覆話：「我老公不知幾開心！仲升咗好幾個Level，一啲都冇嬲！」啲女人成日話「人哋嘅男友/老公唔會令人失望」，咁依家我哋係咪都可以講句：「人哋老婆果然唔會令人失望」？

資料來源：Reddit