財大氣粗嘅騰訊近年不停使出銀彈攻勢，吸引來自全球嘅遊戲製造商、製作人為其開發遊戲，而著名遊戲《God Of War》嘅製作人David Jaffe近日接受訪問時，就坦言自己都曾經收到黎自騰訊嘅1億美金合約邀請，但佢好快就拒絕咗，「因為你係騰訊，而我唔想同你有任何關係。」

David Jaffe日前接受Podcast節目《Sacred Symbols+》嘅訪問時，透露自己曾經收到黎自騰訊嘅邀請，而佢對呢件事係有幾咁反感，「我曾經收過份1億美金嘅邀請，我被一間中國公司追求…而我嘅答案係『No Thank you』，因為你係騰訊，而我唔想同你扯上任何關係。」然後佢進一步透露詳情，「最麻煩嘅係，個邀請係來自西方騰訊 (即唔係直接來自中國)，而黎搵我嗰個人係個我非常尊敬嘅人，而我唔想搞到佢好冇面。佢喺業界嘅當主管嘅資歷比我都仲要老，我希望佢面皮夠厚頂得住 (被拒絕)，但我都係話，『我唔想同間咁嘅公司、同個咁嘅政府做事。」

Being accused of making up the tencent thing. Man, I am so sorry some of you guys have been so harmed by the media (I get it) that you don't know who to trust. But love, like, or hate me, I don't lie. And I always save the receipts: pic.twitter.com/6e9XLyeTIE

— DAVID SCOTT JAFFE (@davidscottjaffe) April 19, 2022

而喺Podcast嘅稍後部份，David Jaffe再透露點解佢「唔想同騰訊、中國有任何關係」。「你唔好殺人咪得。係，有啲人會話，美國人都唔好得去邊，啱，我哋大家對手都唔乾淨，但我哋有個大家會Give a shit嘅政制，我哋可以試下去改。喺中國，只要你上網講下警察壞話、政府壞話，你就可能被人喺條街到捉走，唔知幾時先搵得返，都未計如果你係個維吾爾族人添呀。」

節目播出後，有網友就認為成件「拒絕騰訊」事件都係David Jaffe吹出黎，但David Jaffe立馬於Twitter公佈當日佢收到邀請電郵後嘅回覆，佢於電郵中指，佢非常享受目前有嘅一切，所以無意離開，但同時表示：「雖然上面呢個係我唔想浪費你時間嘅主因，但老實講我都無辦法接受中國。我知好多人可以、亦會咁做，而且 (接受) 可能係於呢個緊密連接嘅社會上唯一務實而理智嘅生存辦法，但從未都冇人話過我係理智嘅。」