自從演員Meghan Markle嫁入英國皇室後，坊間對其評價一向不佳，認為佢唔尊重皇室傳統，又貪慕虛榮，仲搞到哈利王子與女王一家關係變差。而曾寫過戴妃傳記嘅記者Tina Brown，近日就推出新書《The Palace  Papers: Inside the House of Windsor - The Truth and Turmoil》，大爆更多Meghan八卦——例如佢非常鍾意搲名牌贈品。

據Tina Brown指，早於Meghan認識哈利王子前，佢係有經營緊一個叫「The Tig」嘅個人Blog，而當時佢就已經頻頻用呢個Blog向各大名牌搲免費禮品，「Meghan於各大名牌嘅宣傳人員之間，係以對贈品非常感興趣而聞名」。Tina Brown亦指即使後來Meghan成為王妃，呢個習慣都依然保留。佢引述一名匿名嘅名牌宣傳人員指，有次佢收到來自Meghan團隊嘅電郵，當中Meghan寫道：「確保 (該名宣傳人員) 知道，佢係可以繼續送嘢畀我，佢成日Send嗰啲好嘢黎架」。

「等同賣座電影」，我估佢係講緊《Suits》？

另外Tina Brown亦指，Meghan似乎無法理解皇室嘅規矩。佢指出Meghan與女王嘅服裝助理Angela Kelly，曾經因為Meghan婚禮時戴咩頭飾而發生爭執，「Meghan沒有、或者係唔能夠，理解女王嘅私人助理，與NBC電視台啲合約服裝師之間嘅分別」。Tina Brown亦指出Meghan認為英國皇室需要佢，多過佢需要英國皇室，並希望能夠於皇室中建立「女性中的領導」角色，原因係佢曾經出演過「等同賣座電影」嘅作品。

目前哈利王子與Meghan都未有任何回應。