夜場素來都係結識新朋友、甚至新伴侶嘅好地方，而好多時一切嘅溝通都係源自一次眼神注視，不過近日澳洲一間夜場，就因為要「為客人、表演者及員工創造一個更安全以及真正開放嘅空間」，所以公佈咗一項新嘅「安全指引」，就係「不准未經當時人許可嘅注視」，簡單啲講，就係你「目及」女之前要問下人哋肯唔肯被你「目及」，如果對方唔肯而你繼續望，你就有機會被趕離場。

在 Instagram 查看這則貼文

Club 77（@club77sydney）分享的貼文

澳洲「Club 77」於8月初透過一個IG貼文發佈新嘅「安全指引」，當中就寫到，雖然佢哋非常鼓勵大家去認識陌生人，但「每一種接觸都必須先得到口頭共識 (consent)，更講明所謂嘅「接觸」係包括「離遠望住對方 (Staring from a-far)」，「如果你望住嗰個人唔想被你望，將被視為騷擾行為。」

隨後佢哋就解釋執行安全指引嘅方法，指出每晚都會有一名保安人員擔任「安全人員」，如果人客覺得自己被另一個人客騷擾，就可以去搵佢哋求助，而被投訴者就會被「移出場地」，同時夜場會報警。

縱然「令夜場更安全」的確係一件好事，但「Club 77」提出嘅標準其實非常模糊。正如文首話齋，好多時眼神接觸就係大家於夜場嘅「第一次接觸」，要喺「第一次接觸」前就獲得對方嘅「口頭共識」似乎就本末倒置；其二，就係夜場個環境其實好難分辨每一個人嘅視線，安全人員又點分究竟某男仔係望住某女仔，定係望住企喺女仔後面嘅另一個男仔？再者，又會唔會出現因為某名顧客唔鍾意另一名顧客，而「虛報被望」令前者被趕出場？

不過，睇返「Club 77」個帖文之下嘅反應，似乎大家都幾支持佢嘅新安全措施。大家又點睇呢？