「泰坦號潛水器」事故發生剛滿一個月，但由於事件充滿話題性，至今都仲係唔少網民嘅討論對象。近日更有報導指出《鐵達尼號》、《阿凡達》導演James Cameron，可能會為串流平台開拍以泰坦號為主題嘅劇集，並由Matt Damon擔任主角。不過，日前James Cameron就罕有地於Facebook發文，澄清自己目前冇，將來亦唔會開拍關於事件嘅作品。

泰坦號潛水器

據英國《太陽報》引述知情人士指，「世上最大串流平台之一」目前正審視開拍以泰坦號事件為題嘅劇集，而James Cameron則係導演首選。知情人士指：「呢個話題 (鐵達尼號相關) 對James Cameron嚟講好貼身，佢曾經充滿同情地講述鐵達尼號嘅故事，接手呢個題材 (泰坦號事故) 感覺上係理所當然。」

另外，知情人士亦指，Matt Damon及曾出演《Sillicon Valley》及以《The Big Sick》嘅巴基斯坦裔美國演員Kumail Nanjiani為演員首選之一。

不過，James Cameron就於報導發佈後兩日，於個人Facebook罕有發文回應。佢表示：「我通常唔會回應媒體嗰啲令人反感嘅傳言，但我今次會回應。我並冇傾緊一部關於海洋之門的電影，而我亦永遠唔會咁做。」

雖然James Cameron強烈否認有關傳聞，但就無法排除串流平台或其他片商會搵其他導演執導相關電影、劇集嘅可能性。考慮到泰坦號事件嘅話題性、爭議性，有改編影視作品似乎只係時間問題。

部份資料來源：The Sun