最近YouTube上「上映」咗一部有成兩個鐘、名為《Spide-Man: Lotus》嘅新真人電影，不過就唔係Sony或者Marvel嘅新作，而係由系列Fans Gavin J. Konop透過眾籌集資製作嘅非牟利作品。《Lotus》上映3日內就已經獲得近250萬次觀看，睇黎就相當受歡迎，但其實由2021開始製作以黎，電影就一直爭議不斷，最後更拖足一年式正式發佈。

話說2021年時，當時18歲嘅Gavin J. Konop就宣佈會開拍Fans製嘅真人版《Spider-Man》電影，故事延續Andrew Garfield版嘅《Spider-Man》第二集，講述Peter Parker如何面對Gwen Stacy 離世嘅消息。結果火速籌到10萬美金正式開始拍攝，並於同年10月推出首條預告，吸引到超過280萬次觀看之餘，就連Andrew Garfield以及Tom Holland三部曲嘅導演Jon Watts都有留意到作品。

電影原本預計會於2022年夏天上映，但到6月時就爆出連串風波。首先有匿名Twitter網民貼出電影演員Warden Wayne (飾演Peter Parker，同時為編劇之一) 一連串帶有種族歧視成份嘅對話截圖。雖然Warden Wayne隨後於Twitter表示自己當時年少無知，受保守家庭影響，並公開道歉而且會負上所有責任，但網民就唔太接受佢嘅道歉。

導演兼製作人Gavin試圖發文幫Warden Wayne解話，但隨即有另外網民爆料，指佢本人都曾經有種族歧視、性別歧別以及恐同言論。於是今次就輪到Gavin本人於YouTube發佈影片道歉。而兩單醜聞嘅直接影響，就係電影嘅特效團隊決定集體辭職，指電影已經「配唔上蜘蛛俠這個角色」。醜聞及特效團隊嘅離開繼而影響電影製作進程，無法於原定嘅2022年夏天上映，於是引起參與眾籌嘅金主們不滿，紛紛要求退款。

最後《Spider-Man: Lotus》於一片爭議聲中，喺8月12日正式上線。目前有超過240萬次觀看，14萬個讚好，但同時有3.3萬個倒讚。至於電影好唔好睇，大家就可以去YouTube慢慢欣賞。