早排自同大家提過近年好多日本動漫作品都會用週年紀念或其他借口推出限量腕錶，而當中兩大主力就分別係Premico，以及U-Treasure。而兩個品牌近日亦輪番發力，繼早前介紹過由Premico推出嘅「路飛五檔」腕錶之後，又到U-Treasure推出《索斯機械獸》40週年紀念腕錶！

《索斯機械獸》為小學館以Tomy推出嘅「Zoids」機械獸玩具改編而成，後來發展至整個「機獸系列」動畫。不過由於當年首套《索斯機械獸》動畫係於亞視播放，所以於香港嘅普及度就略低。今次U-Treasure推出嘅「索斯機械獸40週年紀念腕錶」其實同樣係同Seiko合作，整體以主人公「翁彬仔」嘅後期機體「超重裝長牙獅」為主題，所以腕錶用上唔少藍、金色。12點鍾位置有「超重裝長牙獅」嘅標誌、6點位置小錶盤嘅顏色就係參考駕駛艙蓋嘅顏色。

另外三個小錶盤旁邊，以及錶冠都用上「螺絲」設計，呼應原作嘅機械感。底蓋上印有40週年特別紋章以及獨立編號。腕錶限量300隻，售價為59,400Yen，即約HK$3,100左右。但你唔好睇少日本Fans嘅愛及財力，撰文之時300隻都已經賣哂！

資料來源：U-Treasure