近日洛杉磯加州大學（UCLA）學者及說故事者中心（The Center for Scholars & Storytellers，CSS）針對1,500名年齡介乎10-24歲青少年進行調查，發布一份名為《Teens and Screens》研究報告，指出有近51.5%青少年希望影視作品能呈現更多友誼及柏拉圖式愛情，而非性愛及浪漫內容。其中有47.5%人更認為大部份影視情節根本唔需要性愛場面，批評影視界過度渲染浪漫關係。另外，高達39%人表示希望能夠見到更多「無浪漫傾向」（aromantic） 或「無性戀」（asexual） 角色。

《The Idol》劇照

除此之外，有部份青少年更對影視作品常見刻板情節感到不滿，其中一位17歲黑人男性表示：「我唔鍾意每當有男性及女性角色共同出現喺銀幕上，片商就覺得佢哋一定要墮入愛河，美國嘅電影完全缺乏柏拉圖式關係。」而另一名23歲亞裔女性就指出，唔少愛情影視作品都會有以下刻板情節：「男方一開始對女方好衰，但女方最終都會愛上呢個男人。」

《Euphoria》劇照

CSS創辦人兼報告共同作者Yalda T. Uhls表示，雖然研究指出青少年希望影視作品能減少性愛場面，但實際上係反映緊佢哋希望影視作品能夠描述更多唔同類型嘅關係：「我哋知道年輕人正深受孤獨感困擾，並試圖從藝術作品中尋找榜樣。有部分故事創作者會以性愛及浪漫作為角色建立關係嘅捷徑，但荷里活應該要意識到一個重點，就係青少年其實想睇到能反映出唔同類型關係嘅故事。」