由Sony動畫製作嘅Netflix原創動畫電影《Kpop 獵魔女團（KPop Demon Hunters）》，將K-pop偶像、奇幻元素同韓國傳統文化巧妙融合，自6月20日上架後火速席捲全球。除咗破紀錄成為Netflix有史以嚟最多人觀看嘅原創動畫，片中主打歌《Golden》更衝上Billboard HOT 100排行榜第2位，就連IVE 安俞真、Apink 鄭恩地等K-pop偶像都紛紛挑戰翻唱。隨住電影大獲成功，Netflix正計劃擴展呢個IP，包括推出續集動畫、真人版電影、音樂劇、衍生劇集等等。

據外媒《TheWrap》引述消息人士報導，Netflix已經將呢部轟動一時嘅動畫電影視為自家版《冰雪奇緣（Frozen）》，計劃推出更多作品擴大IP版圖。目前正在討論嘅項目包括舞台音樂劇、真人版電影、衍生劇集，以及兩部動畫電影續集，藉此組成一套《Kpop 獵魔女團》電影三部曲。

導演Maggie Kang早前接受《ScreenRant》訪問時亦透露，佢有興奮拍攝續集，並透過支線故事豐富電影宇宙，認為電影仲有好多問題未完全解答，同埋有好多可以探索嘅空間，例如Mira同Zoey嘅背景故事。睇嚟影迷將會喺未來見到更多《Kpop 獵魔女團》宇宙嘅相關作品。