現代人幾乎機不離手，無論喺車廂定街頭，到處都見到各個年齡層嘅「低頭族」。有見及此，最近有外國團隊就忽發奇想，計劃推出一款重達6磅（約2.72公斤）嘅不鏽鋼手機殼，希望透過重量迫大家放低手機，戒除手機成癮症。（但相信對唔少大隻佬嚟講，可能會嫌唔夠重呢！）

呢款名為「6 Pound Phone Case」嘅創意產品由Matter Neuroscience團隊開發，外型彷照80年代嘅「大哥大」手機，由兩塊嘅實心不鏽鋼組成，總重量高達6磅。同時保留充電、音量鍵、電源鍵及鏡頭等開孔位置，換言之用家只要頂得順個重量，仍然可以正常使用手機。而且為防止用家隨意拆除，開發團隊特別設計成螺絲固定結構，必須用到六角匙先能夠安裝或拆除。

目前呢款手機殼正在「Kickstarter」平台眾籌，定價為210美元（約HK$1,630），支援iPhone13至17系列所有機型，預計眾籌成功後會在2026年1月正式出貨。