繼《Breaking Bad（絕命毒師）》及《Better Call Saul（絕命律師）》後，著名製作人Vince Gilligan再度出擊，為影迷帶嚟一部全新原創科幻劇集《Pluribus》，並邀請到《絕命律師》女主角Rhea Seehorn主演﹐將於今年11月7日在Apple TV（前稱Apple TV+）正式播出。

《Pluribus》劇情極度保密，官方只透露故事圍繞一名「全世界最痛苦嘅人」展開，講述佢必須拯救世界，免於人類陷入「快樂」之中。從預告可見，大部分人類似乎都陷入某種「集體迷幻」狀態，唯獨由Rhea Seehorn飾演嘅Carol仍保持清醒，全程都黑面兼滿肚怨氣。片中有一幕總統更對住Carol表示：「放心啦Carol，我哋會搵出你同其他人唔同嘅地方……咁你就可以加入我哋。」與此同時，畫面穿插住科學家身穿防護衣喺實驗室工作嘅鏡頭，氣氛相當神秘詭異。

劇集由Sony Pictures Television製作、Vince Gilligan擔任監製及節目統籌。除咗Rhea Seehorn之外，演員陣容仲包括Karolina Wydra、Carlos-Manuel Vesga等實力派，並有Miriam Shor、Samba Schutte、Peter Bergman等人客串。劇集首季共有九集，將於11月7日一口氣播出頭兩集，其後每星期五更新一集直到12月26日完結。值得一提嘅係，即使第一季都未播出，Apple TV已經提前續訂第二季，可見佢哋對呢部劇集非常有信心。