荷里活鬼才導演Quentin Tarantino（昆頓塔倫天奴）近日在Podcast節目上，分享佢心目中21世紀最佳嘅20部電影。提到日本經典反烏托邦電影《大逃殺》時，佢就直斥由Suzanne Collins創作嘅《飢餓遊戲（The Hunger Games）》小說同改編電影明顯抄襲《大逃殺》，仲話完全唔明日本原作者點解唔告到Suzanne Collins傾家蕩產。

《大逃殺》

2000年上映嘅《大逃殺》由已故導演深作欣二執導，改編自日本作家高見廣春1999年出版嘅同名小說，故事講述一個社會崩壞、青少年問題嚴重嘅極權國家，為震懾全國學生而推出一項名為《新世紀教育改革法案（簡稱BR法）》嘅極端法案，每年隨機抽一班初中生，送去一個無人島互相殘殺，最終只有一個人可以生還。至於美國作家Suzanne Collins於2008年出版嘅《飢餓遊戲（The Hunger Games）》，就係講述一個虛構國家「施惠國」，每年都會從轄下12行政區各抽出一男一女，參加死亡遊戲並全程進行電視直播。兩部作品嘅架構、概念都非常相似，所以Quentin Tarantino非常不解《大逃殺》製作團隊點解冇起訴Suzanne Collins。

《大逃殺》

Quentin Tarantino表示：「我真係唔明嗰位日本作家點解冇告L到Suzanne Collins傾家蕩產？佢哋根本係攞本書照抄！啲戇居嘅書評人根本唔會去睇一套叫《大逃殺》嘅日本電影，所以啲書評人從來無公開指責過Suzanne Collins，仲話咩係佢哋睇過最有創意嘅小說。結果改編電影上映後，影評人一睇就話：『乜L嘢呀！呢套咪即係PG版（家長指引）嘅《大逃殺》！』」

Quentin Tarantino同時透露，佢係最早一批觀看《大逃殺》嘅人，因為佢同導演深作欣二係朋友。當時佢喺日本為《標殺令（Kill Bill）》做前期場景勘察，深作欣二邀請佢去睇私人試映：「當時我完全唔知自己會睇到啲咩㗎。但睇完之後...holy fxxking shit！我都唔知睇咗啲乜，太癲、太瘋狂啦！三個月後我去西雅圖電影節，主辦方喺午夜場播《大逃殺》，當時美國仲未有人睇過呢部電影，嗰次係我有史以來最興奮嘅放映之一，因為我知道觀眾將會睇到啲咩，呢部戲一定會超越佢哋嘅想像，而且佢哋未準備好迎接呢份衝擊。」

值得一提嘅係，《飢餓遊戲》作者Suzanne Collins一直否認佢嘅作品係取材自《大逃殺》。佢喺2011年接受《紐約時報》訪問時表示：「我交稿之前，完全未聽過嗰本書或者嗰位作者。後來有人提起，我就問編輯我要唔要去讀下嗰本書？編輯當時同我講：『唔好，我唔想你個腦入面多咗另一個世界，你繼續寫返自己嗰套就得。』」