奧斯卡金像導演趙婷（Chloé Zhao）日前接受Podcast節目《The Town》訪問，罕有談及當年加入Marvel Studios嘅經過，並透露自己最初係應徵執導《黑寡婦（Black Widow）》而非《永恆族（Eternals）》。

節目上，主持人問趙婷係咪Marvel主動邀請佢，而佢只係點頭表示有興趣時。趙婷即刻糾正：「唔係，係我主動聯絡佢哋。」並笑言外界成日講到好似係Marvel單方面向佢招手咁，但實情係佢自己敲門嘅。

趙婷憶述道，當年同Marvel最初傾嘅項目就係《黑寡婦》，但因為夾唔到時間，所以被安排接觸另一個項目《永恆族》：「我最初係應徵執導《黑寡婦》，但因為檔期衝突告吹。後來《永恆族》監製Nate Moore畀咗份劇本大綱我睇，我睇完後心諗：『嘩！我可以用一班永生角色，以希臘悲劇方式探討人性；仲可以親手創造怪物同天神，係咪？』」

即使由一部較貼地嘅諜戰片，跳去執導一部規模龐大、角色眾多嘅英雄大片，趙婷都冇因為製作規模升級而怯場，並坦言：「我應該要覺得驚嘅。但我唔知道，我通常係嗰種未學識游水就跳落水嗰種人。」更重要嘅係，雖然《永恆族》口碑未如理想，但趙婷並無因此徹底告別超級英雄電影。被問到會唔會再拍Marvel電影時，佢毫不猶豫回答：「我會呀。如果有合適嘅故事，如果故事選擇了我。」

不過，以MCU而家嘅發展方向嚟睇，焦點將放喺末日博士、新復仇者、神奇四俠同新X-Men等角色，《永恆族》系列似乎短期內都會被雪藏，趙婷重返Marvel嘅機會並唔高。

資料來源：worldofreel