荷里活性感女神Sydney Sweeney近日正式進軍時裝界，推出自家內衣品牌SYRN（讀音近似Siren），設計橫跨日常舒適到大膽性感風格，旨在讓女性自由展現自己唔同嘅面向。而作為老闆娘嘅Sydney Sweeney更親身上陣，拍攝一系列性感宣傳照，大騷完美身材曲線。

據外媒《Cosmopolitan》 報導，Sydney Sweeney創立SYRN嘅初衷，其實係源於佢自細以嚟對身材嘅困擾。佢透過新聞稿表示：「我讀六年級（Grade 6）已經有DD Cup上圍，嗰陣我真係好憎自己著緊嘅胸圍。直到我買到第一件又靚、又真正啱身嘅胸圍，我著到爛都唔捨得換。所以為不同身形女姐設計內衣，係SYRN嘅一大核心理念。」

Sydney Sweeney又指：「我想創造一個空間，等女性可以隨意切換唔同角色。」並以自己作為例子：「我鍾意整車、玩滑水、又會盛裝出席紅地氈，返到屋企就變返個攬住狗狗嘅狗奴。我唔只得一個面向，其實冇任女性只有一個面向。」

為咗照顧不同身形及風格，SYRN提供多達44種尺碼，由30B到42DDD都有涵蓋，而大部分款式定價都低於100美元，主打好睇又親民。品牌同時將產品分為四大系列，分別為Seductress（誘惑）、Romantic（浪漫）、Playful（玩味）以及Comfy（舒適）。據網民留言所指，率先開賣嘅「Seductress」系列短短幾個鐘內已經全數Sold Out，無論咩尺碼同款式都被搶購一空，都唔知係Sydney Sweeney號召力強大，定係首批貨源本身唔多，總之就係一貨難求。