Apple今日正式發布全新入門級手提電腦MacBook Neo，呢部新機除咗輕薄便攜，定價更只需HK$4,799起，如果符合教育優惠更低至HK$3,999就可以入手！對於一班預算有限、又心思思想入坑Mac生態圈嘅學生哥同輕度文書用家嚟講，今次絕對係一個極大誘惑。

外觀設計方面，MacBook Neo採用13吋Liquid Retina顯示器，而且沒有「瀏海」設計。機身採用鋁金屬一體成型設計，重量只有約1.22kg，厚度僅1.27cm，保留咗輕巧便攜嘅特色。總提供經典銀、靛藍、胭脂以及橘黃色四款活力配色可選，而且機身配色更延伸至內建嘅精妙鍵盤，營造出更和諧一致嘅設計美感。

雖然定價親民，但MacBook Neo嘅效能絕對唔惹少。Apple今次破格地未有採用Mac常見嘅M系列晶片，而係將高階iPhone 16 Pro同款嘅A18 Pro晶片下放到新機上，配合8GB記憶體。足以應付日常文書處理、上網睇片，甚至輕度剪片及執相，官方宣稱速度比市面上配備Intel Core Ultra 5嘅同級PC快最多50%。

同時受惠於A18 Pro晶片極佳嘅能源效率，機身可提供高達16小時電池使用時間，帶出街做嘢一整日都唔使四圍搵插蘇或帶火牛。擴充連接方面，機身設有兩個USB-C埠（支援外接一部最高4K 60Hz顯示器）及一個3.5mm耳機孔，並配有1080p FaceTime HD鏡頭及支援空間音訊嘅雙揚聲器。

MacBook Neo香港售為HK$4,799起（256GB，無Touch ID），而512GB版則售HK$5,499（附設Touch ID），目前新機已於Apple官網受預訂，3月11日正式發售。