《Pong》1972

由Atari創辦人Nolan Bushnell同Ted Babney開發嘅第二個遊戲，亦都係以「Atari」名義發行嘅第一隻電子遊戲。玩法同畫面都極其簡單，玩家只需以轉鈕控制球拍(其實即係一條白色長條)上下移動，以撃中(嚴格上係被撃中)喺畫面中間移動嘅「乒乓波」(其實即係一個白點)，漏接嘅話對方就會得到一分。由於獲得空前成功，當時甚至有外銷到美國海外，亦成電子遊戲史上第一台街機(之前的都因為未能普及)。

《食鬼(Pac-Man)》 1980

由岩谷徹為Namco設計嘅遊戲，於1980年五月於日本推出、同年10月登陸美國。其代表性在於打破當時由《太空侵略者》為首嘅射擊遊戲(以及少量由《Pong》衍出而來的運動遊戲)壟斷整個遊戲界嘅局面，開創出一種創新之餘又男女皆宜嘅遊戲玩法。受歡迎到除咗遊戲，仲出到手提機、玩具、衫甚至家品。

《俄羅斯方塊》1984

成長於八十年代後半、九十年代前半嘅你一定有玩過嘅遊戲，但其實最早係由前蘇聯電腦工程師Alexey Pajitnov為咗解決一個名為《五格骨牌(Pentomino)》嘅遊戲而設計出黎，並以Tetra(希臘文嘅"4"，因為每個形狀都係以4個方格組成)和Tennis(Alexey鍾意嘅運動)合成「Tetris」的名稱。

後來遊戲輾轉由東歐傳入歐美等地，因為簡單玩法但又變化無窮而掀起一股熱潮。1989年任天堂Gameboy喺北美發售時同梱嘅就係《俄羅斯方塊》，亦令其成為整個Gameboy時代銷量最高嘅遊戲。

《Super Mario Bros.》1985

紅白機(北美稱為NES)年代嘅經典，從自製造出一個遊戲王國，到今時今日仲係支撐整個任天堂嘅重要系列。但其實「瑪利奧」呢個角色最早係喺同由宮本茂開發嘅街機遊戲《Donkey Kong》中出現，但直到《Super Mario Bros》先真正得到眾人目光。遊戲嘅受歡迎程度甚至能夠一手拯救當時面臨重大危機嘅NES市場。截止2006前被《Wii Sport》超過為止，都係全球最暢銷遊戲。

《DOOM》1993

由John Carmack同John Romero為id Software於DOS系統下推出嘅第一身射擊遊戲。除咗以血腥畫面、(以當時黎講)精美3D貼圖開創FPS(First Person Shooting)遊戲嘅王朝，在其他層面上亦有重大代表性。例如以WAD檔案製作關卡，令到一般玩家可以改動遊戲內的幾乎一切事物，亦衍生出多個不同遊戲。另外《Doom》亦係第一個容許玩家以乙太網(Ethernet)上網連線多人模式嘅遊戲。甚至連銷售模式(頭三關免費下載試玩，然後付費解鎖後續關卡)都係開創先河！

《World of Warcraft) 2004

如果話《Doom》為FPS(第一身射擊遊戲)落下定義，咁《WoW》就絕對將「MMORPG (Massive Multiplayer Online Role-Playing Game)」發揮得淋漓盡致。《WoW》絕對唔係第一隻MMORPG遊戲(起碼文青當時就已經玩緊RO)，但就絕對係當中營運得最成功。由《Warcraft》、《Starcraft》、《Diablo》等知名遊戲開發商Blizzard開發，用上《Warcraft》的故事為基礎，發展成為營運超過十年、最高峰付費用戶達1250萬人(2008年)嘅史上最大型MMORPG。