圖片：theFA

英格蘭喺歐洲國家盃十六強以1-2輸俾冰島出局後，終於手起刀落炒咗鶴臣。自此英格蘭足總好努力搵新領隊，人選傳過美國領隊奇連士文甚至阿仙奴領隊雲加，不過最後英格蘭都係屬意用本土領隊，喺新特蘭領隊艾拿戴斯同英超升班馬侯城領隊布魯士之間揀咗前者，尋晚仲正式公佈埋大Sam係新一任英格蘭領隊。查實搵大Sam教英軍都唔係好意外， 因為每次英格蘭換領隊基本上都見到佢個名，只係英格蘭近年國際大賽成績都好麻麻，而家英格蘭搵佢教係咪有決心想重返國際列強之列，定安於現狀？我就望唔透喇。

圖片：Skysport

新特蘭之前都放大Sam同英格蘭足總談判，仲叫足總請唔請大Sam都好，唔使急最緊要快，等佢哋容易啲做季前準備工作。星期四連天空體育同BBC都報導英格蘭足總好快會公佈大Sam會執教英格蘭。艾拿戴斯係典型英格蘭式領隊，都係鍾意典型英式足球，講究體力同身體對抗，擅長4-4-2。只係英超中上游球隊而家都已經唔多用呢個陣，因此英格蘭而家嘅人腳反而唔啱大Sam用，英格蘭足總拉搵佢，除咗係英人之外，真係唔明佢有乜咁吃香。

圖片：eurosport

大Sam最出名就係做護級專家，職業生涯最威水就係長時間執教保頓，同埋2011年幫韋斯咸升上英超同2014-15年球季幫球隊留喺前列，執教生涯無贏過乜嘢大錦標。搵佢教英格蘭係咪意味住英格蘭足總已經認定自己唔再係勁旅，總之打大賽唔好咁失禮，英格蘭管返英格蘭足球就OK呢？捧得英格蘭，大部份球迷都唔會覺得英格蘭仲可以入到世界盃決賽之類，但係連英格蘭想改革同變強嘅決心都睇唔到，就比輸任何比賽都失望。

圖片：Telegraph

事已至此，艾拿戴斯做英格蘭領隊，咁新特蘭點算？而家英國傳媒就話天才莫耶斯係下任新特蘭領隊大熱。有賭開波嘅朋友話以後長買新特蘭對家就穩賺，但莫耶斯當年將愛華頓由護級球隊帶到可以衝擊前四都唔講得笑，就算當年俾曼聯掃地出門，都有大把英超球隊搵佢出山，真係咪當人lulu先得架。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。