圖片：sportsillustrated

巴西足球錦標最後一塊拼圖終於入手，尼馬帶領巴西奧足喺奧運男足決賽喺互射十二碼踢走德國，除咗一報2014世界盃巴西大敗1-7之仇外，仲幫巴西拎咗史上第一面奧運男足金牌，奧運金牌喺足球嚟講份量唔算重，不過身為C朗美斯之後嘅球王接班人，呢面金牌對奠定佢球壇地位就好重要。

圖片：mirror

球會成績嚟講，尼馬就唔多使點講，個人表現當然出色啦，上季幫巴塞打49場入31球，打咗短短三年巴塞已經乜都驘過，要成為下代球王，點都要有國際賽表現支持。尼馬都驘過洲際國家盃，但奧運隊入面，佢係三位超齡球員之一。算係隊中老大哥，咁意義當然唔同，而且今屆奧運巴西頭兩場都驘唔到波，以為巴西會步美洲國家盃後塵分組賽出局，好彩最後都負所望。

圖片：thebiglead

不過，尼馬份人都係輕挑浮燥，除咗打巴塞不時有挑釁對手嘅行為之外，原來佢唔係咁襟激，話說開賽前有幾個球迷走去挑釁尼馬，嘲笑佢分組賽表現低迷，咁球迷口痕都閒啫，點知尼馬抵唔住頸完場後走埋場邊同嗰幾位球迷用粗口罵戰。口痕球迷幾時都有，又使咩同球迷一般見識？尼馬想足球生涯可以更加輝煌，睇怕要收收火先得。

圖片：fcbarcelona

咁巴塞球迷最關心係尼馬幾時返球會尼？巴塞官方就交代咗啦，尼馬會打埋九月初世界盃外圍賽先會歸隊，即係話呢個禮拜西甲就肯定見唔到尼馬，最快都要9月中西甲重開時對艾拉維斯場波尼馬先會再為巴塞上陣。

 李羅渣(facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。