聽日就放假啦，唔知大家係去緊旅行，定係準備緊去旅行？你會選擇咩航空公司？坐咩客位？我知大部份「平民」如你同我，出國旅行坐Premium Econ都已經算係對自己好好，但早年新加坡航空已經有「頭等床位」，出名豪華嘅阿提哈德航空更加出咗個「頭等單位」添呀！

著名Youtuber Casey Neistat早前就親身上去試坐過阿提哈德航空嘅新A380客機嘅「頭等單位」The Residence。單位總共有三個空間，半封閉式客廳有張兩座位梳化，正對一個大到過份嘅電視，足足三尺Leg Room；走廊盡頭就係全密封式睡房，有再多部電視同一張雙人床，如果係情侶夫婦一同入住啦喎…嘿。

至於走廊中途仲有個乾濕分離、設備齊全嘅私人浴室加廁所，最適合啲無時無刻都鍾意痴埋一齊嘅情侶，嗱你沖涼，我踎塔，幾恩愛呀！

除此之外，The Residence內仲有私人雪櫃、同一張可完全收納嘅超大餐檯，飛機餐亦唔係碟頭飯式上，而係逐道逐道菜上嘅正式晚餐。