受疫情影響，大家近排或多或少都試過要Work From Home，甚至有公司食住個勢關閉Office，以後都係WFH。雖然WFH係慳返好多時間，但時間一長好多人就發現，原來自己屋企係唔適合做嘢架喎！連個適合做嘢嘅位都冇架喎！咁點算呢？Panasonic就係睇中大家呢個需要，推出家用Partition「KOMORU」。

圖片：Panasonic

Panasonic指，根據市場調查，大部份要WFH嘅人都係喺客廳入面做嘢，而KOMORU就係一個可以放喺客廳嘅「家用Partition」。其結構非常簡單，就係兩塊1.2米見方、成直角擺放嘅板，入面再放張檯，貼牆放之後就可以圍出一個大約一平方米嘅半私人空間，等大家有足夠空間專心手頭上嘅工作，又未至於同屋企人完全隔離。兩邊圍板上設有小孔，方便大家掛上裝飾或者工作需要嘅物件，而使用木材則令「KOMORU」更能融入家中環境。

KOMORU會於9月18日於日本推出，售價為88,000Yen，即係接近HK$6500。好貴呀可？放心啦，隨住WFH漸漸成為慣例，市埸上一定有更多更平嘅選擇。