1.唇部

小編真係見過有男友人，明明個咀乾到爆，都唔肯搽潤唇膏，終於個咀真係爆拆，血都滲晒出嚟，仲走去用條脷舔啲口水就當無事，其實咁做係會越來越乾，愈裂愈勁，旁人見到咁嘅情況只會覺得好恐怖，仲邊有女仔肯錫你，解決方法，最直接就梗係搽潤唇膏啦！

2.面部T字位

成面油光，好容易俾人覺得你唔乾淨，或者覺得你好狼狽，如果本身已經係油性皮膚，大熱天時，面油就會顯得更加厲害，就算你幾咁靚仔，油光嘅出現都將你嘅魅力扣減咗一大半啦！萬一啲油光真係係咁標，袋定枝保濕噴霧，再用紙巾印幾下，減低油光出現機會啦！

3.頭髮

頭皮嚴重似足落雪情形嘅話，絕對影響你嘅女人緣，離遠見到你由頭至膊頭都佈滿頭皮，驚嚇度可以話直達一百。男士們理應每日洗一次頭，以杜絕頭皮滿天飛嘅情形，又或者你嘅頭皮出現敏感情況，先會導致頭皮出現，若有以上情況，應該睇吓醫生再處理。

4.雙手

好多男士都忽略護理雙手，以為粗糙雙手更加有男人味，但你再諗真啲，雙手甩皮兼起繭，有咩啲人會見到咁嘅雙手會覺得開胃呢，除非你做勞動性工作，或有主婦手就無得講，更加要體諒，但你唔係嘅話，最低限度都要護理吓佢，搽hand cream之餘，亦盡量減少用熱水洗手嘅次數。