「點解啲鐘錶嘅設計，絕大多數都係圓形?」圓形嘅錶盤比較受歡迎，呢個係事實嚟，即使唔係Perfect Circle，都會係橢圓形；技術層面嚟睇，因為機芯設計令指針依照圓形運行，所以錶盤一般嚟講都會設計成圓形。不過呢，有例就必有例外，NOMOS Glashütte Tetra 就係行「正正方方」嘅路線。

2016年Basel首度推出嘅自動上鏈版Tetra neomatik男裝錶，採用咗新一代動機芯DUW 3001，呢隻自家研發機芯具自製擒縱系統，配高溫燒製藍色游絲，機芯僅厚3.2mm，提供動力儲存大約42個鐘，直徑為28.8mm。

先頭講咗，錶盤成正方型33x33mm，錶殼係不銹鋼兩件式結構，standard藍寶石水晶透明底蓋，加埋就係成隻錶嘅厚度7.2mm。錶盤有兩款顏色，一係就白底電鍍銀配青藍色分鐘時標，一係就深藍色 (tieblau) 漆面配綠色分鐘時標。

兩款同樣具備30米防水深度，錶帶都係黑色霍爾文高級科爾多瓦馬皮。