「CP值」(性價比、Cost-Performace Ratio)呢個概念，相信大家都非常熟悉，但你哋又有冇聽過「TP值」(Time-Performance Ratio，可譯做性時比)呢個概念？日本書籍《TP經濟學》嘅作者廣瀨涼日前於《集英社Online》上撰文，表示日本年輕人極度著重「TP值」，結果導致佢哋非常抗拒入場睇戲，但就算喺屋企睇，有近半人都會以倍速播放、又或先睇劇透，用盡每一分每一秒。

日本Z世代對電影內容的消費意識。左為「CP值重視」比率，右為「TP值重視」比率

日本Z世代觀看電影時嘅行為，上至下為「分心做其他事」、「倍速播放」、「跳住睇」及「先睇劇透」
條狀圖顏色深至淺為「經常做」、「偶爾做」、「不太會做」及「從未做過」

如果「一蚊買到幾多嘢」就係所謂「CP值」的話，咁「TP值」就可以理解為「一分鐘做到幾多嘢」。據廣瀨涼指，當一個人嘅時間金錢有限，但接受嘅信息量越黎越大、佢本身關注嘅嘢又多，而且從社交平台上能夠搵到大量帶來類似體驗嘅內容 (以電影黎講，即係嗰啲「五分鐘講電影」)，人們消費「自己不真正感興趣嘅嘢」時就會變得非常謹慎，會傾向只將時間金錢用於「真正感興趣嘅事」上，以慳返不必要嘅金錢及時間消耗。同時由於網絡變化瞬息萬變，有時你決定進行某種消費或活動，個熱潮已經過咗。以「睇戲」一事為例，之所以會近半年輕人選擇先睇劇透，其實就係佢哋希望對沖「浪費時間」嘅風險，希望入場前就確保套戲係好睇嘅。

另外廣瀨涼亦表示，年輕人眼中「睇一套唔鍾意嘅戲」嘅損失，並唔係單單戲飛錢、入場時間等，更重要係失去用同一個舊錢及時間可以做、其他可能更有趣嘅嘢，亦即係經濟學中嘅「機會成本」。而呢種「明明唔睇呢場戲，可以去做某某事」造成嘅負面情緒，亦係年輕人眼中嘅「損失」。由此可見，入場睇戲既唔平、又充滿 (套戲可能唔好睇) 嘅不確定性，就算好睇你都唔能夠同時做其他嘢，甚至被佢影響到自己情緒，加上電影由院線進入串流平台嘅時間間距越黎越短，而喺屋企睇戲基本上能免除以上所有缺點，所以日本年輕人就越黎越少入戲院睇戲。

資料來源：集英社Online