由Keanu Reeves主演嘅《Constantine （魔間行者）》於去年9月宣布開拍續集，引起網絡一陣熱議。最近導演Francis Lawrence就向各大影迷交代最新製作進度，並表示將以R級規格製作《Constantine 2》。

Francis Lawrence日前接受《Gamespot》專訪時表示，由於受荷活里編劇罷工潮影響，導致製作進度嚴重落後，目前連劇本都尚未完成，不過佢同Keanu Reeves以及編劇Akiva Goldsman一直都有開會構思故事大致走向，餘下仲有好多部份需要討論，而且佢哋都希望能夠將《Constantine 2》製作成一部真正嘅R級電影。

順帶一提，當年Francis Lawrence為遵循片商華納兄弟規則，因而作出唔少妥協，盡量將《Constantine》拍成PG-13級別（即13歲或以下人士觀看時需家長指引），然而電影最終都被美國電影協會評為R級，所以佢今次決定拍得更恐怖及暴力，更貼近原著漫畫，直接以R級尺度製作續集。